" ތިޔަ ހިޔާލުގައި މަގޭހިތް - ކުދިކުދި ވެގެން ދަނީއޭ.." (2)

- އަބްދުﷲ ޝަފީގް އަލީ-

އަހަރެންގެ މަސައްކަތް ހުންނަގޮތުން ގިނަ ވަގުތު އުޅެން ޖެހެނީ އޮފީހުން ބޭރުގައެވެ. ނަމަވެސް ލިއުޝާ އޮފީހަށް ވަނުމުން، އޮފީސްތެރޭގައި ވަގުތު ހޭދަކުރެވެން ފަށައިފިއެވެ. ލިއުޝާއާ ދޭތެރޭ ބެހެއްޓޭ ހާއްސަ ކަމަކުން، އަހަރެންގެ އޮފީހުގެ މަސައްކަތްތަކަށް ބުރޫއަރާކަށް ބޭނުމެއްނޫނެވެ. އަހަންނަކީ އެއަށްވުރެ ފޯރިއާއި، ޖޯޝުގައި މަސައްކަތްކުރާ މީހެކެވެ. ކުޑަދުވަސްކޮޅެއްގެ ތެރޭގައި އޮފީހުގެ ވެރިންގެ ކުރިމަތީގައި އަހަރެންގެ މަގުބޫލުކަން ލިބުމުގެ އެންމެ ބޮޑު ސިއްރަކީވެސް އެއީއެވެ.

މިކަމުގެ ހައްލެއް ބޭނުންވެގެން ފުރަތަމަވެސް ވާހަކަދެއްކީ އަހަރެންގެ ރަހުމަތްތެރި އާސިމްއާއެވެ. ލޯބީގެ ތަޖުރިބާ މަދު، އެހެނަސް އަހަރެންގެ ތިބި މަދު ރަހުމަތްތެރިންގެ ތެރޭގައި އެންމެ އިތުބާރުކުރެވޭ އެކަކީ އާސިމެވެ. ކުޑައިރުން ފެށީގެން ބަދަލެއްނުވެ ހުރި ހަމަ އެކަނި ރަހުމަތްތެރިޔާއެވެ.

" ބުނަން ރަނގަޅު ވާހަކައެއް..އަންހެން ކުދިންނާ އެހާ ސީރިއަސްވާކަށް ނުވާނެ..ކިތަންމެ ހިތްކިޔާ ކުއްޖަކު ފެނުނަސް، އެ ނުވެދާނެ ރަނގަޅު ކުއްޖަކަށް...ދިރިއުޅުމުގެ ތި ހުސްކަމުގެ ސަބަބަކީވެސް ކުރިން ދިމާވި އަންހެން ކުދިންނާ އެކީ ކުރި ހިތި ތަޖުރިބާތައް..އެހެންވީމަ އަހަންނަށް ފެންނަނީ ހަމަ ތި އަންހެންކުއްޖާ ދޭތެރޭ ނުވިސްނަން.."

އާސިމް ގެ ހިޔާލު ފާޅުކުރިއެވެ.

" ……..އަދިވެސް އެހެން ހިޔާލެއް ދީފާނަން.. ބުނެ އެއްނު ދަގަނޑު ކެނޑޭނީ ދަގަނޑުންނޭ..އެހެންވީމަ ލިއުޝާ އާ އެކީ 'މަޖާ' ވަގުތު ކޮޅެއް ހޭދަކޮށްލަބަލަ...ހަމަ މަޖާކުރާނީ..އޭރުން އެހެން ހިޔާލުތަކުން ސަލާމަތްވެ، ކުރީގެ މާޒީވެސް ހަނދާން ނެތިދާނެ....ބުނަން ، ސީރިއަސް ނުވާތި..."

ވަރަށް މާނައިން ފުރިގެންވާ ގޮތަކަށް އާސިމްގެ ދެވަނަ ހިޔާލުވެސް ދިނެވެ.

އަހަންނަށް ވިސްނަން މަޖުބޫރުވިއެވެ. މިފަހަރު ދިރިއުޅުން ތަފާތުކޮށްލަން ޖެހެއެވެ. އާސިމް އެބުނީވެސް ދޮގެއްނޫނެވެ. މީގެ ކުރިން ތަފާތު ހިތި ތަޖުރިބާތައްވަނީ ކުރެވިފައެވެ. އެއީ އަލުން ހަނދާންކުރަން ބޭނުންވާ ވަރުގެ މާޒީއެއްނޫނެވެ.

ޖެހިގެން އައި ދުވަހު ހެނދުނު ހެނދުނާ އޮފީހަށް ގޮސް، ލިއުޝާއާއި ވާހަކަ ފަށާނެ ގޮތަކާ ދޭތެރޭ ވިސްނާލީމެވެ. ހޮނިހިރު ދުވަހެއްކަމަށް ވުމުން އަހަރެންގެ މަސައްކަތްތައްވެސް ވަރަށް ލުއި ދުވަހެކެވެ.

".........ސައިބޯން ދާނަންތަ"؟

ކައުންޓަރު ކައިރިއަށް ހުއްޓި، ވަރަށް ހިތްވަރުކޮށްފައި އަހާލީމެވެ.

"އުމް..ނޫން...ސައިބޯހިތެއްނެތް"

ފޮތަކަށް ގެއްލިފައިން ލިއުޝާ ޖަވާބުދިނެވެ.

" ...ދެން ކޮފީއެއްވިޔަސް އޯކޭ ދޯ..ދާނަން؟؟.."

ދެވަނަ ފުރުސަތަކަށްވެސް ދައުވަތު ދިނީމެވެ.

" އޯކޭ...ހިނގާ .." ވަރަށް ލަދުން ހުރެ އެއްބަސްވިއެވެ.

ދެމީހުން މިސްރާބު ޖެހީ ކައިރީގަ ހުރި 'ލަސަކުރާ' އަށެވެ. ކެފޭ އަށް ވަދެވެންދެން ދެމީހުން ކުރެ އެކަކުވެސް ވާހަކައެއް ނުދައްކަމެވެ.

ސަޔަށް އޯޑަރު ދިނުމަށް ފަހު ދެމީހުންވެސް ފެށީ އޮފީހުގެ ވާހަކައެވެ. އެކި އެކި މަސައްކަތްތަކުގެ ވާހަކައެވެ. އޮފީހުގެ ވާހަކަ ނިމުމަށް ފަހު ދައްކާނެ ވާހަކައެއް ނޭންގުނެވެ. އަނެއްކާވެސް ހިމޭން ވަގުތުކޮޅެކެވެ.

މި ހިމޭންކަން އަހަންނަށް އުނދަގޫ ކުރަމުން ދިޔައެވެ.

"މިއަދު ހާދަ ސަޅިއޭ...ތި އޮފީސް ކިޓް...ވަރަށް ގުޅޭ"..

އަހަރެން ބުނީމެވެ.

" އެހެންތަ...ޝާޑު ވެސް، ވަރަށް ސްމާޓޭ.."

ހީލަމުން ލިއުޝާވެސް ޖަވާބު ދިނެވެ.

އެ ހިސާބުން ދެމީހުންގެ ދިރިއުޅުމުގެ ބައެއް ވާހަކަތައް ހިއްސާކުރީމެވެ.

ލިއުޝާ އުޅެނީ ކުއްޖަކާ ރައްޓެހިވެގެން ކަމާއި، ނަމަވެސް އެއީ ކަނިވެ ނިވެމުންދާ ގުޅުމެއް ކަންއެނގުނެވެ. ލޯތްބަށް ވުރެ ރަހުމަތްތެރިކަން އޮތް ގުޅުމެއްކަމަށްވެސް ބުންޏެވެ. އޮފީހަށް އައިސް ގޮސް ހަދަނީވެސް އޭނައާއި އެކު ކަމަށާއި، އެއީ ދެން އިތުރު އެހެން ގޮތެއް ނެތީމައެވެ.

އަހަރެންގެ ދިރިއުޅުމުގެ ބައެއް ވާހަކަތައްވެސް ހިއްސާކުރީމެވެ. އަހަރެންގެ އެކަނިވެރި ހަޔާތުގެ ވާހަކައަށް ވުރެ ބޮޑަށް ދެއްކީ ކުރިއަށް، މުސްތަގުބަލު ރާވަން ހިޔާލުކުރާ ގޮތުގެ ވާހަކައެވެ. ކުރީގެ ވާހަކަތައް ދައްކައިގެން، އަންހެން ކުއްޖެއްގެ ފަރާތުން އިތުރު ހަމްދަރުދީ އެއް ބޭނުންނުވާތީއެވެ.

ލަސަކޫރާއިން ނިކުތްއިރު ދެމީހުންވެސް ތިބީ ކުރީގެ ބީރައްޓެހިކަން ކެނޑިފައެވެ. އަހަރެންގެ ބައެއް މަޖާ ވާހަކަތަކުން ލިއުޝާ ހެމުން ދިޔައިރު ދުރުން މަންޒަރު ބަލާ މީހަކަށް ހީވާނީ ހާއްސަ ގުޅުމެއް އޮތް ދެމީހުންހެންނެވެ.

ކަންތައްވީވެސް އެގޮތަށެވެ. އޮފީހަށް ވަތްގޮތަށް ކުރިމަތިވީ ދުރުން މަންޒަރު ބަލަން ހުރި ލުތުފީގެ ސުވާލުތަކެވެ. އޮފީހުގެ އެކައުންޓްސްގަ އުޅޭ ލުތުފީ އަކީ އޮފީހުގެ އެންމެ ގާތް އެކަކެވެ.

"ނޫން...ހަމަ ފްރެންޑްސް އިނގޭ...އެއްވެސް ގޯސް ހިތެއް ނެތް"

ލުތުފީގެ ސުވާލަށް ޖަވާބު ދިނީމެވެ.

" ވިސްނައިގެން އުޅޭތި...އޮފީހުން ބިޓެއް ނެގުމަކީ އެހާ ސަޅި ކަމެއްނޫން.،،އެނގޭދޯ، މީޙުން ބުނެއެއްނު ހިހޫތަނުން ކެވޭ ލޯތްބަކީ އޮފީސް ލޯތްބޭ.."

ލުތުފީ އިންޒާރެއް ފަދައިން ބުންޏެވެ.

" އެނގޭ....އެކަމަކު ތިހިސާބަކަށް މި ގުޅުމެއް ނުދާނެ،..ތީވެސް އޮފީސް ރައްޓެއްސެއް، ލިއުޝާވެސް އެއީ ހަމަ ތި ކަހަލަ ރައްޓެއްސެއް.."

އަވަހަށް ސަލާމަތް ވުމުގެ ގޮތުން ޖަވާބުދީފައި ސެކްޝަނަށް ވަނީ އެ މައުލޫގައި ލުތުފީ އިތުރު ސުވާލެއް ކުރިމަތިވެދާތީއެވެ.

(ނުނިމޭ).

Read more »

"ތިޔަ ހިޔާލުގާ މަގޭހިތް - ކުދިކުދިވެގެން ދަނިއްޔޭ......." (1)

- އަބްދުﷲ ޝަފީގް އަލީ-

އެއަރޕޯޓުން އައިގޮތައް ދަބަސް ހިފައިގެން ދިޔައީ އަލްފްރެސްކޯއަށެވެ. އަހަރެންގެ ފެވަރިޓް ކޮފީޝޮޕެވެ. އެތަން ހިތްގައިމުވީ މީގެ އަހަރުތަކެއް ކުރިން ފެށިގެންނެވެ. ހަމައެކަނި އަލްފްރެސްކޯއެއްނޫނެވެ. އެސްޓީއޯ ޓްރޭޑް ސެންޓަރުގެ ކޮންމެ ތަނަކީ އަހަރެންގެ ފެވަރިޓް ތަންތަނެވެ. އެހެންނުވާންވީ ސަބަބެއްނެތެވެ. އެއީ އަހަރެންގެ ލިއުޝާގެ އޮފީސް ހުންނަ އިމާރާތެވެ. އަހަރެންގެ އެތައް ހަނދާނެއް ހަރުލާފައި ހުރި އިމާރާތެވެ. އަލްފްރެސްކޯގައި އިންނައިރު އަހަރެންނަށް ނުފެނި ލިއުޝާއަށް އޮފީހުން ނުދެވޭނެއެވެ. އަލްފްރެސްކޯއަށް ދަނީ އެހެންވެގެންނެވެ. ސިޔާސީ ވާހަކަތަކުން މުޅި ކެފޭ އަޑުގަދަވެފަ އޮތަސް އަހަރެންގެ ނަޒަރު ހުއްޓެނީ ކުރިމަތީގަ ހުންނަ ވަށްސިޑިއަށެވެ. ކޮފީތަށި ހިހޫވެ، ދެވަނަ ފަހަރަށް ގެންނަން ޖެހުނަސް ލިއުޝާ ފެނުނީމަ ނޫނީ އެތަނުން ދާހިތެއް ނުވެއެވެ.
..............

އެއީ މީގެ 5 އަހަރު ކުރިއެވެ. އޯލެވެލް ނިންމާލުމަށް ފަހު އޮފީހަކަށް ވަނީ ކިޔަވާހިތް ނުވާތީއެއްނޫނެވެ. އާއިލާގެ ހާލަތު ހުރިގޮތުން އިތުރަށް ކިޔަވައިދިނުމުގެ ތަނަވަސްކަން ނެތީމައެވެ. އަހަރެންގެ ހަގަށް އިތުރު 3 ކުދިން ތިބެއެވެ. އެމީހުނަށް ކިޔަވާދިނުމާއި އެހެނިހެން ހަރަދުތައް ކުރަން ޖެހެނީ ހަމައެކަނި ބައްޕައަށް ލިބޭ ކުޑަ މުސާރަކޮޅުންނެވެ.

އަހަރެންގެ ޝަކުވާއެއްނެތެވެ. އެ ދެމަފިރިން އަހަރުމެން ދަރިންނަށް ޓަކައި ނުއުފަލަނީ ކޮން ބުރައެއްހެއްޔެވެ. އަހަރުމެން ހަތަރުބެއިންނަށް ރީތިވާ ސާމާނާއި އެންމެ ފަހުގެ ފެޝަން ތަކުގެ ހެދުންތައް ގަނެދެއެވެ. ގަޑިންގަޑިއަށް ކާން ލިބެއެވެ. މަންމައާއި ބައްޕަ ފިހާރައަކުން އާ ހެދުމެއް ގަނެގެން ލީ ދުވަހެއް ހަނދާނެއް ނެތެވެ. މުޅިންވެސް ރައްޓެހިންދޭ ހެދުމާއި ގާތްތިމާގެ މީހުން ހަދިޔާއަށްދޭ ހެދުން ނޫނީ އެމީހުންނެއްނުލައެވެ. އަހަރުމެން އެކި ފާޑުގެ ރީތިވާ ސާމާނު ބޭނުން ކުރިޔަސް މަންމަގެ ފެވަރިޓަކީ ދަނޑި ސައިބޯންޏާއި ކާށިތެލެވެ.

މާލޭގެ ކުޑަ ތަނެއް ކުއްޔަށް ހިފައިގެން އުޅެން ޖެހުމުން ބައްޕައަށް ޖެހިފައިވާ ބުރަ ފިލުވުމުގެ ގޮތުން އަހަރެން ވަނީ އަމިއްލަ އޮފީހަކަށެވެ. ބިދޭސީ މުއައްޒަފުން ގެންނަ އެ ކުންފުނީގެ އަހަރެންގެ މަސައްކަތަކީ އެތަނަށް ގެންނަ ލޭބަރުން ބަލާ އެއަރޕޯޓަށް ދިއުމާއި، އެމީހުންގެ ވިސާއާއި އެހެނިހެން ކަންތައް ބެލެހެއްޓުމެވެ. ކުޑަ އޮފީހެއްކަމުން ކޮންމެ ސެކްޝަނެއްގައިވެސް މަސައްކަތްކުރަނީ އަހަރެން ފަދަ ހީވާގި އެންމެ މީހެކެވެ. އެހެންކަމުން އޮފީހުގެ މައްސަލަތައް މަދުވެ އަހަރުމެންގެ އެކުވެރިކަންވެސް ވަރަށް ބޮޑެވެ.

އަހަރެން ފިޔަވާ އެންމެނަކީވެސް ކައިވެނިކޮށްގެން، އާއިލާގެ ޒިންމާތަކެއް އަދާކުރާ މީހުންނެވެ. އެހެން ކަމުން ރޭގަނޑު އޮފީހުގެ އިތުރު މަސައްކަތެއް ޖެހުނަސް އުފަލާއި އެކު، އަހަރެން އެކަނި ކުރަނީ އެހެން މީހުންނަށް ލުއިކޮށްދީ، އާއިލާ އަކީ ކިހާ މުހިއްމު ބައެއްކަން ވިސްނޭތީއެވެ. އެހެންނޫނަސް ރޭގަނޑު ކުރާނެ އިތުރު އެހެން ކަމެއްވެސް ނޯވެއެވެ. އަހަރެންގެ ހަޔާތުގެ ބައިވެރިއެއް ނެތި، ހަޔާތް ވޭތުކުރަތާ ދެއަހަރަށް ވުރެވެސް ގިނަ ދުވަސްވީއެވެ. މިހާތަނަށް ރައްޓެހިވި ތިން ކުދިންވެސް ރުޅިވެގެން ދިޔައީ އެކިއެކި ބަހަނާ ދައްކާފައެވެ. އެކި ކުދިންނާ އެކި މުއްދަތަށް ރައްޓެހިވިޔަސް ކޮންމެ ކުއްޖަކާވެސް ރައްޓެހިވަނީ ވަރަށް ސީރިޔަސްކޮށެވެ. ކައިވެނި ކުރުމުގެ އުފާވެރި، ފޮނި އުއްމީދުތައް ކުރަމުންނެވެ. އެހެން ނަމަވެސް އެ ހުވަފެން ބިލާހަކަށް ވެގެން ދަނީ ހިތްކުދިކުދި ކޮށްލާފައެވެ. އަންހެންކުދިން ދެކެ ފޫހިވާން ފެށީ އެހިސާބުންނެވެ. ވޭތުވެ ދިޔަ ދެއަހަރުގެ ދުވަހުގެ ތެރޭގައިވެސް އިސްވެ، ބައެއް އަންހެން ކުދިން ލޯބި ހުށައެޅިއެވެ. އަދި އެނޫން ގޮތްގޮތުންވެސް އަންހެން ކުދިންގެ ފަރާތުން އިޝާރާތްތައް ލިބެމުން ދިޔައެވެ. އެހެން ނަމަވެސް ކޮންމެ ފަހަރަކުވެސް އަހަރެން ދެނީ އެމީހުން ފޫހިވާ ކަހަލަ ޖަވާބުތަކެވެ. އަނެއްބައި ފަހަރު އަޅާވެސް ނުލަމެވެ.

އަންހެން ކުދިންނާ ދޭތެރޭ ދެވަނަ ފަހަރަށް ވިސްނަން މަޖުބޫރުވީ އަލަށް އޮފީހަށް ގުޅުނު ލިއުޝާގެ ސަބަބުންނެވެ. އޮފީހުގެ މަސައްކަތްތައް ފުޅާވެ، މުއައްޒަފުންނާއި ބައެއް ސެކްޝަންތައް އިތުރުކުރުމުގެ ތެރޭގައި، އަލަށް ވެއްދި ހަމަ އެކަނި އަންހެން ކުއްޖަކީ ލިއުޝާ އެވެ. ފުރަތަމަވެސް ލިއުޝާ ފެނުނީ އޮފީހަށް އަންނަންވެގެން ސިޑިން އަރަނިކޮށެވެ. ދެމީހުންވެސް ދިމާވީ އަހަރެންގެ އޮފީސް ހުންނަ އެސްޓީއޯ ޓްރޭޑް ސެންޓަރުގެ ވަށްސިޑިންނެވެ. ދެމީހުންވެސް އެކަކު އަނެކަކުގެ ގައިގަ ނުޖެހި ސަލާމަތްވީ ކިރިޔާއެވެ. އަހަރެން މައްޗަށް އެރީ ލޭބަރ މިނިސްޓްރީއަށް ގެންދަން ޖެހޭ ލިޔުންތަކެއް ބަލައެވެ. ލިއުޝާ ތިރިޔަށް ފައިބައިގެން އައީ ވަރަށް ހެވިފަހުރެގެންނެވެ. އެ ރީތި ހިނިތުންވުން ފުރަތަމަވެސް އަހަރެންގެ ހިތަށް އަސަރުތަކެއް ކުރުވިއެވެ. މީގެ ކުރިންވެސް އެތައް ކުދިންނެއް މި ސިޑިން ދިމާވިއެވެ. އެކަމަކު މި އިހްސާސެއް ދުވަހަކުވެސް ނުވެއެވެ. ހީވަނީ އެތައް ފަހަރަކު ދެކިފަ ހުރި މޫނެއް ހެންނެވެ. އެހެންނެއް ނޫނެވެ. ވެދާނެއެވެ. ހިންދީ ފިލްމީ ތަރި ބިޕާޝާއާ ވައްތަރުވުމުން، ތަންކޮޅެއް ރަނގަޅަށް ބަލާލެވުނީއެވެ. އެއީ ސަބަބެއް ކަމަށް ބަލާފައި، އޮފީހަށް ވަނީ ދެންމެ ދިމާވި ކުއްޖާގެ ސޫރަ ހަނދާން ނެތޭނެކަމުގެ އުއްމީދުގައެވެ.

ކަންތައްވީ ހީކުރިގޮތަކަށް ނޫނެވެ. ޖެހިގެން އައި ދުވަހު އޮފީހުގެ ކައުންޓަރުން އަހަންނަށް މަރުހަބާކީ ލިއުޝާއެވެ. އިއްޔެ އަހަރެންގެ ކައިރިން، ރީތި ހިނިތުންވުމަކުން ހިތް ކުދިކުދިކުރަމުން ދިޔަ ލިއުޝާއެވެ. މާބޮޑު ޝައުގުވެރިކަމެއްނެތް ގޮތަކަށް އަހަރެން އަމިއްލަ އަށް ލިއުޝާއަށް ތައާރަފް ވެލީމެވެ. ޖަވާބުގައި ލިއުޝާވެސް ތައާރަފް ވެލިއެވެ. އެ ރީތި ހިނިތުންވުމާ އެކުގައެވެ. އަހަރެން ފަދައިން ލިއުޝާވެސް އޯލެވެލް ނިންމާލުމަށް ފަހު، މިއީ ފުރަތަމަ ވަޒީފާއެވެ. އޮފީސް މާހައުލާއި، މަސައްކަތުގެ ދާއިރާގައި ތަޖުރިބާ ނެތަސް އަހަރުމެން އޮފީހުގެ ރިޝެޕްސަނުގައި އިންނަން އެންމެ އެކަށީގެންވަނީ ލިއުޝާ ފަދަ ރީތި، މަޑުމައިތިރި އަންހެން ކުއްޖެކެވެ. ޒަމާނުގެ ފެޝަންތަކުން ހައްދު ފަހަނަ އަޅާފައިނުވާއިރު ލިއުޝާގެ ހެދުން އެޅުމުގެ ސާދާގޮތް ފުރަތަމަ ދުވަހުވެސް އަހަންނަށް ފާހަގަ ކުރެވުނެވެ. މުޅި ދުވަހު އޮފީހުގެ މަސައްކަތުގައި ހޭދަ ކުރަމުން ދިޔައިރު ބޭއިހްތިޔާރުގައި ލިއުޝާގެ ހަރަކާތްތަކަށް ވެސް ބެލެއެވެ.

(ނުނިމޭ)

Read more »

ކުނިތަކުގެ ތެރޭގައި މަރުވެފައި އޮންނާނީ އަހަންނެވެ. (ފަހުބައި)

-އަބްދުﷲ ޝަފީގް އަލީ-

"................އަހަރެންގެ މި ވާހަކަ އަޑު އަހާފައި ފައިސަލް ގޮތެއް ނިންމާށެވެ. ފަހަރެއްގައި ހިތްހަމަ ނުޖެހިވެސްދާނެއެވެ. އަހަރެން ބޭނުމީ މި ވާހަކަތައް ނިމުމުން ފައިސަލް ގޮތެއް ނިންމުމެވެ. ހިޔާލެއް ދިނުމެވެ. އަހަރެން މިހިރީ ކޮންމެ ގޮތެއްވިޔަސް މީހެއްގެ ހިޔާލެއް ބޭނުން ވެފައެވެ. ވަރަށް އަންޑަސްޓޭންޑިންވާ މީހެކެވެ. ދުނިޔޭގަ އުޅޭ ތަފާތު އިންސާނުންގެ މިޒާޖާއި ވިސްނުން ތަސައްވަރު ކުރެވޭ ކަހަލަ މީހެކެވެ. ފައިސަލް ތިއީ ރާއްޖެއިން ބޭރުން މަތީ ތައުލީމް ހާސިލްކޮށްފައިވާ ޒުވާނެކެވެ. ތަފާތު މީހުން ފެނި، ސިކުނޑި ހުޅުވިފައި ހުންނާނެކަމަށް އަހަރެން ހީކުރަމެވެ. އަޑު އަހާށެވެ. މީ އަހަރެންގެ 'ސިއްރު' ހަޔާތެވެ. .......................

.............އަހަރެން އުޅެބޮޑުވީ ވަރަށް 'ބަންދު' މާހައުލެއްގައެވެ. އެހެންކަމުން ހިޔާލާ ވިސްނުމާއި ފިކުރުވެސް ހިންގެނީ ހިތަށް އަރާ އެކި ކަންތައްތަކަށެވެ. އެކަހަލަ އެއްވެސް ކަމެއް އެހެން މީހަކަށް ކިޔާނުދެމެވެ. ވާނެ ގޮތެއްވެސް ނާހަމެވެ. އަހަރެންމީ ކޮންކަހަލަ އަންހެނެއްކަމެއް ނޭންގެއެވެ. އަހަރެން ސްކޫލްގަ އުޅުނު އިރުވެސް އެއްވެސް ފިރިހެންކުއްޖަކާ ގުޅުމެއް ނުބާއްވަމެވެ. އަހަރެން ބުނަން މިއުޅެނީ އަހަރެން ގަޔާ ވަނީ އަންހެންކުދިންނާއެވެ. އެހެން ހިތަށް އެރީ އެންމެ ފަހަރަކުއެވެ. އޭގެ ފަހުން އެކަމަށް ހަމަ ހިޔާލު ކުރެވެން ފެށިއެވެ. އެ ހިޔާލާ އެއްކޮޅަށް ސިކުނޑި ދޫކޮށްލީމެވެ. އަހަރެން ހީކުރި ވަރަށްވުރެ ސިކުނޑީގެ ތެރެއަށް އެ ހިޔާލުތައް އެކި ގޮތްގޮތަށް ވަދެ އަހަރެންގެ ބޮލަށް ސަވާރުވިއެވެ.

އެހިޔާލުތައް ތަރައްގީވީ އޮފީހަށް ވަދެ އިންޓަނެޓްގައި އުދުހުނު އިރުއެވެ. އަންހެންކުދިންގެ ބަރަހަނާ ފޮޓޯތައް ވަކި ހާޑަކަށް އަޅައިގެން ގެންގުޅެން ފެށުނެވެ. ޗެޓް ރޫމްތަކުން އެކަހަލަ ކުދިންނާ ދިމާވެސް ވިއެވެ. މުޅިންވެސް ރާއްޖެއިން ބޭރު ކުދިންނެވެ. އެކުދިންނާ ބަރާބަރަށް ވާހަކަދައްކަމެވެ. މިއީ ލޯބިކަމެއް ނުވަތަ އަލާފިލުވުމުގެ އިހުސާސެއްކަމެއް ނޭންގެއެވެ. އަބަދުވެސް އަހަރެންގެ ޗެޓްލޮގްތައް ފަހަށް ރައްކާކުރަން ގެންގުޅެނީ އަހަރެންގެ ހާޑް ޑްރައިވްއެވެ. އެއީ ފޫހިވާ ދުވަސް ދުވަހު އެކަނި އިނދެ ބަލާލުމާއި އެކަންތައްތައް ކިޔާލުމަށެވެ.

އަހަރެން ޒާހިދުގެ އަތްދަށަށް ދިއުމަށް މެދުވެރިވީ އެ ހާޑެވެ. އޮފީހުގެ ކުއްޖަކު ޒާހިދު އަތަށް ދީގެން އެ މީހުންވަނީ އޭގެ ހުރިހާ އެއްޗެއްގެ ކޮޕީއެއް ހަދާފައެވެ. ކޮންފަދަ ބިރުވެރިކަމެއް ހެއްޔެވެ. ޒާހިދު އެބުނަނީ ތެދެކެވެ. އަހަރެން މީ ކޮންކަހަލަ އަންހެނެއްކަން މުޅި މާލެއަށް ފަޅާ އަރުވާލާ ދުވަހަކީ އަހަރެން ލަދުން މަރުވާނެ ދުވަހެކެވެ. އަހަރެންގެ އާއިލާއާ ގުޅުން ކެނޑޭނެ ދުވަހެކެވެ. މަންމަގެ ހިތަށް ކުރާނެ އަސަރަކީ ހިޔާލުކޮށްލިޔަސް ވަޒަން ކުރެވޭނެ ކަމެއްނޫނެވެ. ކޮންފަދަ ފާފައެއް ކަމާއި އަދި މީހުން އޭރުން އަހަންނަށް ވަނަމެއްގެ ގޮތުގައި ގޮވާނެ ނަންވެސް އިނގެއެވެ. އަހަރެން ނަމުގެ ކުރިއަށާއި ފަހަތަށް 'ތަގަރި' (ލެސްބިއަން) އިތުރު ވާނެކަމަކީ ދުވާލުގެ މި އިރު ފަދައިން މުޖައްރިބު ކަމެކެވެ..
ނަމަވެސް އަހަރެން ހުވާކޮށްފައި ބުނަމެވެ. އެއީ ހަމައެކަނި ކުރި ހިޔާލެކެވެ.

އަހަރެންގެ ވާހަކަ ނިމުމުން ފައިސަލް އަށް ބަލާލީމެވެ. އޭނަ އަހަރެންގެ މޫނަށް ބަލަހައްޓައިގެން ހުރުމަށް ފަހު ދުރު ބަލާލީއެވެ. ފައިސަލް ހިތްހަމަ ނުޖެހުނީއެވެ. ހަޔާތުގެ ވާހަކަތައް ކިޔާދޭން ޖެހިލުންވަނީވެސް މިހެންވެގެންނެވެ.

"ކޮންކަމަކާ ތި ވިސްނަނީ....އެނގޭ ފައިސަލް ހިތްހަމަ ނުޖެހޭނެކަން.." ފައިސަލްއަށް ބުނީމެވެ.
"ނޫން...ހިތް ހަމަ ނުޖެހެނީއެއްނޫން..އަހަރެން މި ވިސްނަނީ އަހަރެން ބުނާގޮތެއް ހަދަން ކެރޭނެހޭ....؟ ، އަހަރެން ބުނާ ގޮތެއް ހަދައިފިނަމަ ، އެ ހިތްވަރު ހުރި ނަމަ ޒާހިދު ގެ ކިބައިން ސަލާމަތް ވެވިދާނެ"

ފައިސަލް ގޮނޑީގައި ހަމަ ޖެހިލަމުން ވާހަކަދައްކަން ފެށިއެވެ.

"................................ތީ އެހާ ބޮޑު މައްސަލައެއް ނޫނެވެ. ދުނިޔޭގައި އުޅޭ ކޮންމެ އިންސާނެއްގެ ބަލިފައެއްވެއެވެ. އެ ބަލި ފަޔަކީ ތިމާ އެކަމަކަށް ހިތް ކިޔަމުންދާ ކޮންމެވެސް އަމަލެކެވެ. އެކި މީހުން އެކި ކަންތަކެވެ. ގޯސްކަންތައްތައް ކަމަށް ބަލާ ކޮންމެ ކަމެއް ކޮންމެ އިންސާނެއްގެ ސިކުނޑީގައި ވެއެވެ. މަސްތުވުމާއި ރާބޯ ހިތްވާ މީހުންނެވެ. ޖިންސީ ގުޅުން ހިންގާހިތުން ނިދިނައިސްގެން އުޅޭ މީހުންނެވެ. އެއް ޖިންސުން ގުޅުން ހިންގާހިތްވާ އެ ހޯމޯނުގެ އަހުލުވެރިންނެވެ. ވައްކަން ކުރާ މީހުންނެވެ. ދޮގުހެދުމާއި، ގީބަ ބުނުމާއި މީހުންގެ ނެތި ނުބައި ވާހަކަ ދައްކަމުން ހިނގާ މީހުންނެވެ. ބައެއް މީހުންނަކީ ޖެހިލުންވުމެއްނެތި ކުރާ މީހުންނެވެ. އަނެއްބައި މީހުންނަކީ އެކަމަކަށް ހިތްކިޔަމުން ފަރިކުރަމުންގޮސް ރަނގަޅު ދަނޑިވަޅެއްގައި ކުރުމަށް މަޑުކޮށްގެން ތިބޭ މީހުންނެވެ. ތިމާގެ ހަށިގަނޑުގައި އެއްވެސް ގޯސް އަމަލެއްގެ ސިފައެއް، ހިޔާލެއް ނުވެއޭ ބުނާ ކޮންމެ އިންސާނަކީ އިންސާނެއްނޫނެވެ. އަދި އެއީ އިހުސާސެއްނެތް ފުޅަ މަސްގަނޑެކެވެ.

ރަނގަޅު ކަންތައްތަކުގެ ދާއިރާވެސް ހަމަ މިފަދައެވެ. ރަނގަޅުކަމެއް ކުރުމަށް އެކި މީހުން ހިޔާރު ކުރަނީ އެކި މަގެވެ. ސަދަގާތް ކުރާ މީހުންނާ އަޅުވެރިންނެވެ. މީހުންނަށް ހެޔޮފޯރުވާ މީހުންނެވެ. ރަނގަޅު ނަސޭހަތްދޭ، މީހުންނަށް އެހީތެރިވެ، އަނެކުންގެ އިހްސާސްތައް ދަންނަ މީހުންނެވެ. މައިން ބަފައިންނާ އެކުވެރިންނަށް އަޅާލާ އޯގާތެރިވާ މީހުންނެވެ. އޭގެ މާނައަކީ ކޮންމެ އިންސާނަކީ ރަނގަޅު ސިފަތަކުގެ ތެރެއިން ހުރިހާ ކަމެއް ފުރިހަމަ މީހެއްނޫނެވެ. އަހަރުމެން ނަކީ އިންސާނުންނަށް ވީތީއެވެ.

ކުށެއް ކުރުމަށް ހިޔާލު ކުރުމަކީ ކުށެއް ނޫނެވެ. އަދި އެކަމަށް މަގުފަހިވާ ސާމާނު އަތުލަފިކޮށްގެން ތައްޔާރަށް ހުރުމަކީވެސް ކުށެއްނޫނެވެ. ކުށަކަށްވަނީ އެކަމެއް ކުރުމުންނެވެ. އިންސާނާ އެމީހާ އުފެދިފައިވާ ގޮތަށް އުޅޭށޭ، އެމީހާގެ 'ނޭޗާރ' އާއި އެއްގޮތަށް ދީލާލާށޭ އަހަރެން ނުބުނާނަމެވެ. އެއީ ޔޫރަޕް ގެ އެތިއަސްޓުންގެ މޮޓޯއެވެ. އަހަރުމެންނަކީ އިސްލާމުންނަށްވިތީ، އަހަރުމެން ދަސްކުރަން ޖެހޭނީ ތިމާގެ ބޮލަށް ސަވާރުވާ ނުބައިކަންތަކާ ހަނގުރާމަ ކުރުމަށެވެ. ދީނީ އިލްމުވެރިންވެސް ބުނެނުދީ ހުންނަނީ މިވާހަކައެވެ. ކޮންމެ މީހަކުވެސް އެމީހާގެ ބަލިފައިގައި އަސާ ވިއްދާށެވެ. އޭރުން ތިމާއަށް ސީދާ ތެދަށް ހުރެވޭނެއެވެ. ސީދާ މަގުގައި ހިނގޭނެއެވެ.

...................ސަނާގެ ހިޔާލުގައި ތީ، ތި ހީކުރާ ކަހަލަ އަންހެއްކުއްޖެއްނޫނެވެ،. 'ބައި، / ލެސްބިއަން' ހިޔާލުން ދުރުވެވިދާނެއެވެ. ގެރި އަބަދުވެސް ވާނީ ގެރިއަށޭ ނުބުނާށެވެ. ކުޑަކުޑަ ކެޓަޕިލާ އަބަދު އެގޮތުގައި ނޯވެއެވެ. ކިހާ ރީތި ކޮކާލަކަށް ބަދަލުވާތަން ނުދެކެން ހެއްޔެވެ. ތީ ކެޓަޕިލާއެއް ކަމަށް ބަލާށެވެ. މާދަމާ ލޯބިލޯބި ރަތް ކޮކާލެއްހެން މިނިވަންކަމާ އެކީ އުދުހިލާށެވެ..................."

ފައިސަލްގެ ވާހަކަތަކުން އަހަރެންނަށް ހަމަ ރަނގަޅަށްވެސް ރޮވިއްޖެއެވެ. ކުރިން އަޑު އިވިފައިނުވާ އެތައް އިންސާނީ ދިރިއުޅުމުގެ ހަގީގަތްތަކެއް ކިޔާދީފިއެވެ. ކޯތާފަތްމަތިން ފައިބަމުންދާ ކަރުނަތައް އަހަރެން ފޮހެލީމެވެ. އޮއްސެމުންދާ އިރުގެ ރަތް ދޯދިތަކަށް ބަލަހައްޓައިގެން ހުރެ ހީލީމެވެ. ޒާހިދު އާއި ކުރިމަތީ ލާނެގޮތާއި އަހަރެން ބުނާނެ ވާހަކަތައްވެސް ފައިސަލް ކިޔާދިނެވެ. އަހަރުމެން ދެމީހުން އަތުގުޅުވާލައިގެން ހިގަމުން ދިޔައީ ފެރީތަކާ ދިމާއަށެވެ. އަހަރެން ހިޔާލުގައި އިނދެ ރާވަމުން ދިޔައީ ޒާހިދުއާ މުގާބަލާ ކުރާނެ ގޮތެވެ.

ދުވަހަކުވެސް ނުވާ ވަރަށް ރީތި ވެލައިގެން އަހަރެން މިސްރާބު ޖެހީ ޒާހިދުގެ ގެއާ ދިމާއަށެވެ. ފޯނުކޮށްފައި އަހަރެން މިރޭ ދާނެ ވާހަކައާއި ވަރަށް ބޮޑު ވާހަކައެއް ބުނަންވެފައިވާކަމަށް ބުނީ އެ ގަޑީގައި އޭނަ އެތާ ހުރުމަށެވެ. ފަރިތަކަމާއެކު ސިޑިން އަރައިގެން، އެކޮޓަރީގެ ދޮރުގައި ޓަކި ޖަހާލީމެވެ. ދެވަނަ ފަހަރު ޓަކި ޖަހާލުމުގެ ކުރިން ދޮރުހުޅުވިއެވެ. ޒާހިދު ހުރީ ސޯޓުބުރިއެއްލައިގެން ހުސްގަޔާއެވެ. އަހަރެން ފެނުމުން ބޮލުން ފެށިގެން ފަޔާ ހަމައަށް ބަލާލިއެވެ. އަދި އަހަރެންގެ ރީތިކަމަށް ތައުރީފް ކުރިއެވެ. އަހަރެން މިއައި މަގްސަދާއި ބުނަން ބޭނުންވަނީ ވަރަށް މުހިއްމު ވާހަކައެއްކަމަށް ބުނީމެވެ. އަލަމާރިން ޓީޝާޓެއް ނެގުމަށް ފަހު އެ ލައިގެން އެނދުގައި ހަމަ ޖެހިލުމަށް ބުނީމެވެ. މިރޭ އަހަރެން ހުރީ އަމުރުކުރާ ކަހަލަ މިޒާޖެއްގައެވެ. ކުރިން އަހަރެން އަމިއްލަ ނަފްސަށްވެސް ގަބޫލުނުކުރެވޭހާ ސާބިތުކަންމަތީގައެވެ. އެއާ ހިލާފަށް ޒާހިދުގެ ކޮންމެ ހަރަކާތެއް ކުރަނީ ހައިރާން ކަމާއެކީގައެވެ. ކުރިން ފެނުނު ވަރުގަދަ ފިރިހެނާގެ ހަރަކާތްތައް ލަސްވެފައި މަޑުމައިތިރިއެވެ.

"ސަނާ...ކިހިނެތް ވެފަ ތިހިރީ...ހާދަ ތަފާތޭ..." ޒާހިދު އަޅައިގަންނަމުން ކަހަލަ ގޮތަކަށް ބުންޏެވެ.
"ތަފާތުވެސް ވާނެ، އަހަރުމެން އިންސާނުން ވީމަ ބޭނުން ގޮތަކަށް ބަދަލުވެވިދާނެ،..މީހުން ހީކުރަނީ ބަދަލުވެވޭނީ ހަމައެކަނި ޖިންނިންނަށޭ ދޯ....އެމީހުންނަށް ހަމައެކަނި ބަދަލުކުރެވޭނީ ސިފަ....އަހަރެން މިހިރީ ހުރިހާ ގޮތަކުންވެސް ބަދަލުވެގެން، އެކަމަކު މިބަދަލު – ބަދަލު ހިފުމަކަށް ނުދާނެ"

އިންޒާރެއްދޭ ފަދައިން ހަރުކަށިކަމާއެކު ޒާހިދުއާ ވާހަކަދައްކަން ފެށީމެވެ. އަހަރެން ގެ ދަބަހުން އެއްހާސް ރުފިޔާ ނަގާ ޒާހިދު އަތަށް ދިނީމެވެ. އޭނަ އެކަމަށް ނޭދެނީސް ފައިސާ ދިން ފުރަތަމަ ފަހަރެވެ. ޒާހިދު ހިފަން ނުހިފަން ހުންނަ ކަހަލަ ގޮތަކަށް ހުރުމުން އެފައިސާ އޭނަގެ ކައިރީގަ ބޭއްވީމެވެ. އަދި އަހަރެންގެ ވާހަކަ ފެށީމެވެ.

"ތިފައިސާ ހުސްވުމުގެ ކުރިން ނިކަމެތި އެހެން އަންހެނުން ކުއްޖަކު ހޯދާށެވެ...މިގޮތަށް ބްލެކްމެއިލްކޮށްގެން އެދުން ހާސިލްކުރާނީއެވެ. އަތުންފައިން ކަމެއްނުކޮށް ދިރިއުޅެން މޮޅުގޮތެއްދޯއެވެ. އެކަމަކު މިހާރު މީހުން ހޭލުންތެރިވަނީއެވެ. ތިކަހަލަ މަކަރުވެރިންގެ ދަލުގައި ޖެހޭނެ ކުއްޖަކު ވާނެކަމެއް ޔަގީނެއްނޫނެވެ. ނަމަވެސް މިއަދުން ފެށިގެން އަހަރެންނަކަށް އެއްވެސް ބާރެއް ނުފޯރުވޭނެއެވެ. އަހަރެންގެ 'ކުށަކުން' ނާޖާއިޒް ފައިދާ ހޯދަމުން، އެ ފަސޭހަކަން ލިބިފައިއޮށްވާ ގޮށްމުށުގެ ބާރުންވެސް ކަންކަން ކުރުމަށް އިސްނެގުމަކީ ތިކަހަލަ މީހުންގެ ފިނޑިކަމެވެ. ތިމާގެ ފުރާނަ ސަލާމަތްކުރުމަށް ކޮންމެ ފަދަ ކަމެއްވެސް ކުރާނެކަން ނުވިސްނުނީ ބާރު އޮތީ ހަމައެކަނި ތިމާ އޭ ހީވާ މީހުންގެއެވެ. އަހަރެން އެ ފަޅު އިމާރަތުގައި މަރުނުވެ ސަލާމަތްވީ ތި އަނިޔާވެރިޔާއަށް އިބުރަތަކަށެވެ.

އަހަރެންގެ ހާޑްޑިސްކުގައި ހުރި ހުރިހާ އެއްޗެއް އެންމެނަށް ދައްކާށެވެ. ނޫސްތަކުގައިވެސް ޖަހާށެވެ. އަހަރެންނަށް އެކަމުން ލިބޭނެ އިތުރު ގެއްލުމެއް ނެތެވެ. ބޮޑެތި މުޖުރިމުންނާއި އެކި ފަންތީގެ ކުށްތައްކޮށްފައިވާ މީހުންވެސް އެނބުރި އިސްލާހުވެގެން މުޖުތަމައުގައި އުޅެމުންދަނީއެވެ. އަހަރެން ފަދަ ދެފެންދޭތެރޭގައި ހުރި މީހަކު ބަލައިގަންނަން ކިހާ ފަސޭހަވާނެހެއްޔެވެ. އާއިލާއާއި މައިންބަފައިން ބަދުނާމުވާނެ ވާހަކަ ބުނީމުނޫން ހެއްޔެވެ؟ ދަރިން ގޯސްމަގުން ހިނގަމުންގޮސް އެނބުރި އެމީހުންގެ ކައިރިއަށް ދިއުމުން ކުރިންވީ ލޯތްބަށްވުރެ އެތައް ގުނައެއް ލޯބިވާނެކަން ނޭންގުނީ ތިމާއަކީ އާއިލާގައި ކިހާ ބާކީ މީހެއްކަން އެނގޭތީދޯއެވެ. އަހަރެންނަށް އެއްވެސް ގޯނާއެއް، ޖެއްސުމެއްވެސް ނުކުރެވޭނެއެވެ. ތިމާ އެހެން މީހަކަށް ގޯނާކޮށް، މާރާމާރީ ހިންގާ މީހުންފަދަ ދުނިޔޭގައި މުސީބާތުގައި އުޅޭނެ ބަޔަކު ނޫޅޭނެއެވެ. އެކަނި އުޅެން ބިރުގަންނާނެއެވެ. އަމިއްލަ ދިރިއުޅުމަށް އަލްވާދާއު ކިޔަން ޖެހޭނެއެވެ. ތިމާ އުޅެން ޖެހޭނީ ކޮންމެވެސް ބަޔަކު ހިމާޔަތުގައެވެ. އެ ހިމާޔަތެއް އެއްވެސް މީހަކަށް އަބަދަކު ނުލިބޭނެއެވެ.

އަހަރެންދަނީއެވެ. މީގެ ފަހުން އަހަރެންގެ ދިރިއުޅުމަށް ވައިއެޅިލިޔަސް އަހަރެންނަށްވެސް އިހުތިޔާރާއި ބާރުތަކެއް ލިބިފައިވާކަން ހަނދާންކުރާށެވެ. އަހަރެންގެ ވާހާކައިން މީހުން ކައިރި ހިނގިޔަސް ފަރުވާލެއްނެތެވެ.

އަހަރެން ހިނގައިގަތްއިރުވެސް ޒާހިދު އިނީ ބަލަހައްޓައިގެންނެވެ. އެއްއިރެއްގައި އަހަރެން ބިރުވެރި މީހެއްކަމަށް ދެކިގެން އުޅުނު މީހާއަށް މިއަދު މިއައީ އަނިޔާކޮށްފައެވެ. އޭނަގެ ހިތަށެވެ. ކޮންމެ ކަމެއްވެސް އެނގޭނީ ކުރިމަތީލީމައެވެ. އަހަރެން ކުރިމަތިލުމުން އެކަން އިހުސާސް ކުރެވިއްޖެއެވެ. އިންސާނަކަށްވުރެ ބާރުގަދަ އިންސާނެއް އުޅޭ ހެއްޔެވެ.

އަހަރެން ހީކުރިގޮތާ ހިލާފަށް ޒާހިދުގެ ފަރާތުން އެއްވެސް އުނދަގުލެއް ނުފޯރައެވެ. އަދި އަހަރެންގެ ވާހަކަވެސް ނުދައްކައެވެ. އެއީ ކީއްވެތޯ ނުވެސް އަހަމެވެ. އެއީ އަލުންބަލުން ފަށާވަރުގެ ސިލްސިލާއެއްނޫނެވެ. އެއަށްވުރެ އަހަރެންގެ ދުނިޔެ މިހާރު އަމާނެވެ. އަހަރެންގެ ދުނިޔޭގައި އިތުބާރުކުރެވޭ، ފުރިހަމަ ފިރިހެނަކުވެއެވެ. އެއީ ފައިސަލްއެވެ. ފައިސަލް ނެތަސް މިހާރު ދިރިއުޅެވިދާނެއެވެ. ކޮންމެހެން މުހިއްމީ މީހުންތަކެއްނޫނެވެ. ތިމާ އަމިއްލަ ހިތްވަރެވެ. އެހިތްވަރު ހޯދަން ތިމާ ފަދަ އެހެން މީހަކުގެ އެހީއަށް އެދެން ޖެހެއެވެ.

(ނިމުނީ).

Read more »

ހަގީގީ ހާދިސާ: ކުނިތަކުގެ ތެރޭގައި މަރުވެފައި އޮންނާނީ އަހަންނެވެ... (4)

 -އަބްދުﷲ ޝަފީގް އަލީ-

ނިދާފަ އޮއްވާ ކުށްލިއަކަށް ހޭލެވުނީ ފޯނު ރިންގުވާ އަޑަށެވެ. އަވަސް އަވަހަށް ގަޑިބަލާލިއރު ރޭގަނޑު އެގާރަ ޖަހަނީއެވެ. ފޯނު ކުރަނީ ކާކުތޯ ނުބަލާ ފުރަތަމަވެސް ހިނގައިގަތީ ބަދިގެއާ ދިމާއަށެވެ. ބަނޑުހައިވެފައި ހުރިވަރުންނެވެ. އޭރުވެސް ފޯނުގެ ރިންގުވާ އަޑު އިވެއެވެ. ކޭކު ފޮއްޗެއް ހިފައިގެން އެނބުރިލި ވަގުތު އަހަރެންނަށް ހީވީ ފައިދަށުން ބިންގަޑު ދެމިގަތްހެންނެވެ. ބޮލަށް އެނބުރުން އަރާގޮތްވިއެވެ. އަހަރެންގެ ކުރިމަތީ ހުރީ ޒާހިދުއެވެ. މީހާ ހުރީ ދާހިތްލާ ތެމިފޯވެފައެވެ. އަނގައިވެސް ނުބުނެ އޭނާ ހިފީ އަހަރެންގެ އަތުގައެވެ. ކުއްލިއަކަށް އެގެނައި ހަރަކާތުން އަހަރެންގެ އަތުން ތަށިދޫވެގެން ދިޔައެވެ. އެއަޑަށް ދައްތަ ގޮވާވެސްލިއެވެ. އަހަރެން އަތުން ތައްޓެއް ތެޅުނީކަމާއި އެތަން ސާފްކުރަނީ ކަމަށް ބުނެ އަވަހަށް ޖަވާބުދިނީ ދައްތަ ނިކުމެ އިތުރު މައްސަލަގަނޑަކަށް ވެދާނެތިއެވެ. އޭރުވެސް ޒާހިދު އަނދަމުންދާ ލޮލުން އަހަރެންނަށް ބަލަހައްޓައިގެން ހުއްޓެވެ.

"ހިނގާ ތިރިއަށް.....ތިހެން ލައްކަ ދުވަހު އުޅެވިއްޖެ ދޯ....." ރުޅިއައިސް ތުރުތުރުލާ އަޑަކުން ޒާހިދު ބުންޏެވެ.
"ނޫން...މިހިރީ ފެންވެސް ނުވަރާ..ގޭތެރޭގަ ލައިގެން އުޅޭ ހެދުމުގައެއްނު، ދެންމެ މި ހޭލެވުނީ..ޕްލީސް ދޫކޮށްލާ، މިއަންނަނީ ފެންވަރައިގެން....." އަހަރެން ޒާހިދުއަށް އާދޭސްކުރީމެވެ.

އޭނަ ހުރީ ގޮތްދޫކުރާ ކަހަލަ މޫޑެއްގައެއްނޫނެވެ. ގަދަކަމުން ކަހަލަ ގޮތަކަށް އަހަރެން ގޮވައިގެން ތިރިއަށް ފޭބިއެވެ. ނަސީބަކުން އެވަގުތު މަގުމަތީގަ މީހުން ވަރަށް މަދެވެ. ޒާހިދު އަހަރެން ގޮވައިގެން ގޭ ދޮރުމަތީ މަޑުކޮށްލިއެވެ. އަދި ކުއްލިއަކަށް އަތުގައި ހިފައިގެން ޖެހިގެން ހުރި އިމާރާތަކަށް ވަނެވެ. އެއީ ގެއާއި ޖެހިގެން ކަހަލަ ގޮތަކަށް ހަދަމުންދާ ތިންބުރީގެ އިމާރާތެކެވެ. މުޅިތަނުގެ ތެރޭގައި ވަނީ ސިމެންތި ގޯނިތަކާއި އިމާރަތުގެ ކުނިތަކެވެ. ޖެހިގެން ހުރި ގެތަކުން ލިބޭ ފަނޑުއަލިކަމެއް ފިޔަވާ އެއްވެސް އަލިކަމެއްނެތެވެ. އަހަރެންގެ ގޮވައިގެން ޒާހިދު އެރީ އިމާރާތުގެ ފުރަތަމަ ބުރިއަށެވެ. އެއަށްފަހު އަތުން ދޫކޮށްލިއެވެ.

ޒާހިދު ހިތްފުރޭވަރަށް އަހަރެންނާ ދިމާއަށް އިއްޗިހިކިޔަމުން ދިޔައެވެ. ހަޑިބަސްތަކުން ނާއި ރުޅިވެރިކަމުގެ ހައްދުން ނައްޓާފަހުރިވަރުން އޭނައަށް ކިޔޭ ނުކިޔޭއެއް ނޭންގުނެވެ. ޒާހިދުގެ މައިގަނޑު ޝަކުވާއަކަށްވީ އޭނައަށް ސަމާލުކަން ނުދިނުމާއި، އޭނައަށް އަޅާނުލުމެވެ. އަދި ބައެއް ކަންތައްތަކަށް އިންކާރުކުރާތީއެވެ. ޒުވާބުކުރަމުންގޮސް އެންމެ ފަހުން އަތްއިސްކުރަން ފެށިއެވެ. އަހަންނަށް އަނިޔާވެސް ކުރަން ފެށިއެވެ. ގައިގެ އެތަން މިތަނުގައި ގޮތެއްފޮތެއް ނުބަލާ ތަޅައިގަތެވެ. އަހަރެންގެ އެއްވެސް އިހުސާސެއް ބެލުމެއްނެތި ޖިންސީގުޅުން ހިންގަންފެށިއެވެ. އެއްފަހަރާ ހަށިގަނޑުގެ އެތެރެއާއި ބޭރުން ލިބެމުންދާ ތަދުތަކުން އަހަރެން ހަބަރުހުސްވާހެން ހީވިއެވެ. ނަމަވެސް މި ފަޅު އިމާރާތުގައި، ޖަނަވާރެއް ކަހަލަ މީހެއްގެ އަތްދަށުގައި ހުރެ ހިތްވަރު ދޫކޮށްލައިފިނަމަ ވާނެގޮތް އެނގެއެވެ.

ޒާހިދު އިންޒާރު ދެމުން ދިޔައީ އޭނައަށް ދެން އެފަދަ ގޮތެއް ހަދައިފިނަމަ އަހަރެންނަށް އިތުރު ތަކުލީފުތަކެއް ލިބޭނެ ކަމަށެވެ.

"ބުނަން..މިހާރު އެނގިއްޖެ ދޯ އަހަރެންނާ ކުޅެލައިފި މީހަކަށް ވާނެގޮތް..އަދިވެސް އެހެން ހަދާނަންތަ....މީހަކާ ރައްޓެހިވާނަންތަ؟.... " ޒާހިދު އިންޒާރު ދެމުން ދިޔައެވެ.
"ދެން ފަހަރަކުން އަހަރެން ބުނާ ކަމެއް ނުކޮށްފިނަމަ ސަނާ ފެންނާނީ އެ ކުނިތަކުގެ ތެރެއިން....ބޭނުންތައް އެތާ އޮވެ، ދިރިއުޅުމެ އެންމެ ފަހުނޭވާ ލާން...." އެހެން ބުނެ ޖުމްލަ ނުނިމެނީސް ކަނުގަ ހުރި ހުސްގޯނިތަކާއި ސިމެންތީ ބަސްތާތަކު ތެރެއަށް އަހަރެން ކޮށްޕާލިއެވެ. ނުވިސްނާ ހުއްޓާ ޖެހެނު ގޮތަކުން ބުރަކަށްޓަށް ވަރަށް ތަދުވެސް ވިއެވެ. އަހަރެން އާދޭސް ކުރީމެވެ. ދެން ދުވަހަކުވެސް އެކަހަލަ ކަމެއް ނުކުރާނެކަމަށެވެ. ޒާހިދު ބުނާ ކޮންމެ ކަމެއް ކުރާނެ ކަމަށް ވައުދުވީމެވެ. އަހަރެންނާ ދިމާއަށް އޭނަ އަންނަން ފެށިއެވެ. އަހަރެން މަޑުމަޑުން ހީލެވޭތޯ މަސައްކަތްކުރީމެވެ. އަދި އެހީއަކަށް އެދި ދެއަތް ދިއްކޮށްލީމެވެ. އޭނަ އަހަރެން ނަގާކަށް ނޫޅުނެވެ. އަދި އެހީވުމުގެ ބަދަލުގައި ދެންވެސް ކުރަންފެށީ އިންޒާރެވެ.

"އެނގޭ ދޯ ތީ ކިހާވަރެއްގެ ކުށްވެރިއެއްކަން..." އެހެން ބުނެފަ ޒާހިދު އަހަރެންނާ ދުރަށް ހިނގައިގަތެވެ.
އެހާލުގަ އޮވެގެން އަހަރެން ވިސްނަންފެށީ އަހަރެންނަކީ ކުއްވެރިއެއް ހެއްޔެވެ. ކުށެއް ކުރެވޭނީ ކުއްވެރިއަކަށް ވަނީ ކިހިނެތް ހެއްޔެވެ. އަހަރެންނަށް ކުށެއް ކުރެވުނު ހެއްޔެވެ.. އެ ހުރިހާ ހިޔާލުތަކާއި ތަދާއި ވޭނުން އަހަރެން ގެ ސިކުނޑި ސުމަކަށް ދިޔައެވެ.

އާ ދުވަހަކަށް އިރު އެރިއިރު އަހަރެން ވަނީ ހޮސްޕިޓަލުގައި އެޑްމިޓްކޮށްފައެވެ. ގައިގެ އެތަންމިތަން ވަނީ ޒަހަމް ވެފައެވެ. ފަތިސް ގަޑީގައި އެ ބިދޭސީ މަސައްކަތު މީހާއަށް ނުފެނުނު ނަމަ އަހަރެން މަރުވެގެންދާނީ އެ ކުނިތަކުގެ ތެރޭގައި، ފަޅު އިމާރާތުގައި އޮވެގެންނެވެ. އާއިލާގެ މީހުންނަށް އަހަރެން އެކަންތައް ސިއްރުކުރީމެވެ. އަހަރެން ގެ ހާލުދެކެން އައި އެންމެން ކައިރިވެސް ބުނަމުން އައީ އެކްސިޑެންޓެއްވީ ކަމަށެވެ. ސައިކަލަކުން ޖެހި ލިބުނު އަނިޔާތަކެއް ކަމަށެވެ. މިކަމުގައި އެންމެ އެހީތެރިވެދިނީ ފައިސަލްއެވެ. އެކްސިޑެންވީވެސް ފައިސަލްގެ އަތުންކަމުގައި ބުނެ އޭނަ ޒިންމާ ނެގިއެވެ. އަހަރެން ފައިސަލް ކައިރި ބުނީމެވެ. ހޮސްޕިޓަލުން ދޫކޮށްލިހާ އަވަހަށް ހުރިހާ ވާހަކައެއް ކިޔާދޭނަމެވެ.

ގައިގެ އެތަން މިތަނުގަ ހުރި ޒަހަމްތައް ފަސޭހަވަމުން ދިޔައެވެ. ނަމަވެސް ހިތުގައި އުފެދިފައި ހުރި ޒަހަމްތަކަށް ކުޑަވެސް ލުޔެއް ނުލިބެއެވެ. އެ ބިރުވެރިކަން ދުވަހަކުވެސް ފިލައިގެން ނުދާނެއެވެ. ޒާހިދު ހުރިހާ ހިނދަކުއެވެ. މިހާރުވެސް އެއީ އަހަރެންގެ ލޯބިވެރިޔާއެވެ. ކުއްލިގޮތަކަށް މާލެއައިސް، މާލެގަ އުޅެމުން އެދަނީ އަހަރެންގެ ފައިސާއިންނެވެ. އަހަރެންގެ މަޖުބޫރު ދިރިއުޅުމުން ޒާހިދު އުފާ ހޯދަމުންދަނީ އަހަރެންގެ ހިތަށް ބިރުވެރިކަމާއި އަނިޔާ ދީފައެވެ. އެއަށް ވުރެ ފަސޭހައިން އޭނައަށް އެކަންތައްތައް ފަހިވެފައިހުއްޓައެވެ.

ފައިސަލްއާ ވެސް ގުޅުން ކަނޑާލީމެވެ. އަހަރެންގެ ފަރާތުން ކުށެއްނެތް މީހަކަށް އިތުރު އަނިޔާއެއް ދޭން ބޭނުންނުވާތީއެވެ. ޒާހިދު އެކަން މަނާކޮށްފައިވާތީއެވެ. ފައިސަލް ބަރާބަރަށް އަހަރެންގެ ހާލު ބަލަމުންދިޔައެވެ. ފޯނުވެސް ކުރެއެވެ. އޭނަގެ އަޅާލުމާއި އެ ފޯން ކޯލްތަކަށް ގަސްތުގައި ފަރުވާކުޑަކުރަން ފެށީމެވެ. ދެން ނުގުޅާށޭ ބުނާނެ ހިތްވަރެއް ނެތުމުން މިހެން ހަދައިގެންވެސް އެ ގުޅުން ނިންމާލަން ބޭނުންވާތީއެވެ.

ފައިސަލްއަކީ ވެސް ގޮތް ދޫނުކުރާ ކަހަލަ ފިރިހެނެކެވެ. އޭނަ ބުނަމުން ދިޔައީ އަހަރެންގެ މި ހާލަތު ކިޔާދިނުމަށެވެ. އަންނަމުންދާ ބަދަލު ކިޔާ ދިނުމަށެވެ. އަހަރެން ހިތަށް އެރިއެވެ. މިކަހަލަ ހުރިހާ ގޮތަކުން ބަލިކަށި މީހަކަށް އަހަރެން ސަލާމަތްކޮށްދެވޭނެހެއްޔެވެ؟ އަހަންނަށް އެހީތެރިވެދެވޭނެ ހެއްޔެވެ؟ ފައިސަލްއަށް އިތުބާރު ކުރެވޭނެ ހެއްޔެވެ؟، އޭނަވެސް އަހަރެން ހައްލާލައިގެން، ބިރުދައްކައިގެން ނާޖާއިޒު ފައިދާތަކެއް ނުނަގާނެ ބާވައެވެ. ހުރިހާވެސް މައްސަލައަކީ އަހަންނަށް ދުނިޔެ ތެރެއަށް ލޯ ހުޅުވިފައިނެތުމެވެ. ހަގީގީ ދިރިއުޅުން ނޭންގުމެވެ. ދުނިޔޭގެ އެކޮޅު-މިކޮޅު ނޭންގުމެވެ. މީހުންގެ ދިރިއުޅުމާއި ދިރިހުރުމާ ދެމެދު ހިނގާ ކަންތައްތައް ވަޒަން ކުރަން ނޭންގުމެވެ. ހައްތަހާވެސް އަހަރެންގެ ބަންދުވެފަ ހުރި ސިނކުޑީގެ އުނިކަމެވެ. ހިތަށްއެރި އެންމެ އެއްޗަކުން ދިރިއުޅެން އާދަކުރީމަ ވީގޮތެވެ.

އެ ހާދިސާއަކީ ފައިސަލްއަށް ހުރިހާ ވާހަކައެއް ކިޔާދިނުމަށް، އަހަރެންގެ ދިރިއުޅުން އެއްކޮށް ބަދަލުކޮށްލަން މަޖުބޫރުވި ހާދިސާއެވެ. އެ ބިރުވެރި ހަބަރަކީ އަހަރެންނަށް ދިމާވާން އުޅުނު ކަހަލަ ކަމެކެވެ. އަހަރެން ސަލާމަތްވިޔަސް މިފަހަރު އެ ހާލަތުގައި އޮށްވާ ފެނުނީ ހަމަ އަހަރެން ފަދަ އަންހެން ކުއްޖެކެވެ. ކޮންފަދަ އިއްތިފާގެއްހެއްޔެވެ. މިއަދު މުޅި މާލެ ތެރޭގައި ދައްކަނީ އެ ވާހަކައެވެ. ހަދަމުންދާ އިމާރާތެއްގެ ކުނިތަކު ތެރޭގައި އަންހެން ކުއްޖަކު މަރުވެފައި އޮތީއެވެ. އޮފީސް މީހުންނާއި ރައްޓެހިންގެ ފޯނުތަކުން އެކުއްޖާގެ ފޮޓޯ އަހަންނަށް ދައްކަން މަސައްކަތްކުރިއެވެ. ނަމަވެސް އެ މަންޒަރު ބަލާކަށް ނުކެރުނެވެ. އެއަޑު އިވުނީއްސުރެ މަންޒަރު ސިފަވަމުންދިޔައީ އެއީ އަހަރެން ކަމުގައެވެ. މުޅިދުވަސް ކަހަލަ ގޮތަކަށް ދިޔައީ ބިރުވެރިކަމާއި ހިތް ނުތަނަވަސްކަމުންނެވެ. އަހަރެންގެ މި ޒުވާން އުމުރުގައި އެގޮތަށް ނިމިދާކަށް ބޭނުމެއްނޫނެވެ. އެއް ފަހަރު އެފަދަ ހާދިސާއެއް ހިނގައިފިއެވެ. އެއީ ބިރުވެރި އިންޒާރެކެވެ. ކޮންމެ ފަހަރަކު އެފަދަ ގޮތަކަށް ސަލާމަތްވާނެ 'މުއުޖިޒާތެއް' މެދުވެރި ނުވެދާނެއެވެ. އެއަންހެއްކުއްޖާ ފަދައިންނެވެ.

ފައިސަލްއަށް ހުރިހާ ވާހަކައެއް ކިޔާ ދިނުމަށް އެއްބަސްވީމެވެ. މުޅި މާލޭގަ އަތްފުނާ އަޅައިގެންވެސް ރައްކާތެރި މާހައުލެއް ނުލިބުނެވެ. ހައްތަހާވެސް ޒާހިދު އުޅޭ ތަންތަނެވެ. އޭނަގެ ރައްޓެހިން އުޅޭ ސަރަހައްދުތަކެވެ. ހިތް ބިރުގަނެފަ ހުރިވަރުން އަހަރެން ހުރީ ވަރަށް ބޮޑަށް ރައްކާތެރިކަމަކަށް ބޭނުންވެފައެވެ.

މެންދުރުގެ އެންމެ އަވިބާރުގަޑީގައި އަހަރެން އިނީ ފެރީގައެވެ. އޮފީހުގެ ރަސްމީގަޑީގައި ފުރަތަމަ ފަހަރަށް ގަދަވެ ސަލާމަތުން ހުރެ ސަލާމްބުނި ދުވަހެވެ. އަހަރެން އިނީ އޮފީހަށްދާ ހެދުމުގައެވެ. ރާއްޖޭގެ ވައިގެދަތުރުރު ފަތުރުން ގުޅިފައިވާ މައި ހަބު ކަމަށްވާ ހުޅުލޭއަށް އަހަރެންގެ މިސްރާބު ޖަހާފައިމިވަނީ އަހަރެންގެ ހަޔާތް ރަނގަޅު ފާލަށް އަޅުވާލުމަށް ގުޅުވާލުމަށެވެ. އަހަރެންގެ އިންތިޒާރުގައި ފައިސަލް ހުންނާނެއެވެ. މިއަދު ދިރިއުޅުން ކޮންމެވެސް އެއްގޮތަކަށް އިހުތިޔާރުކުރަން ޖެހެއެވެ. މިހެން އުޅެ ކުނިތަކުގެތެރޭގައި މަރުވެގެން ދިއުމެވެ. ނުވަތަ އެނޫން މަގެއް ހޯދުމެވެ.

ހުޅުލޭގައި އަހަރެންގެ އިންތިޒާރުގައި ފައިސަލް ހުއްޓެވެ. ދެމީހުން މިސްރާބު ޖެހީ ހުޅުލޭ އައިލެންޑް ހޮޓަލާ ދިމާއަށެވެ. އެ ހިތްގައިމު ރެސްޓޯރެންޓުގައި އަހަރުމެން ފިޔަވައި މުޅިންވެސް ތިބީ ބިދޭސިންނެވެ. އެވެސް ވަރަށް މަދުންނެވެ. ލުއިލުއި ކާއެއްޗަކަށް އޯޑަރު ދިނުމަށް ފަހު އަހަރެންގެ ވާހަކަ ފެށީމެވެ.

(ނުނިމޭ).

Read more »